alienArion stage: 搵食

近期口福不淺，各路英雄都要搵食，仲要係好嘢食！
首先介紹「舉高隻手」嘅「農夫......包」！！

由S君帶路嘅旺角街市熟食中心（Sorry，鋪名叫澳門ＸＸ，唔記得），
有一個頭咁大嘅包，有湯有drink，仲有另上嘅咖哩汁。
包嘅涵可以揀牛肉、雞肉、牛油、咖哩雜菜等等，我揀咗咖哩牛腩。
講真，水準一般，牛腩都幾淋，但係碎啲...而且味道界於咖哩同清湯之間，
比較淡口，好在有心地加上一碟外加咖哩汁，點點吓都幾滋味。
兼且街市熟食中心嘅風味真係買少見少，我仲好懷念灣仔街市......
不過提醒大家，由於「風味」關係，好難搵位。

剛過咗嘅星期六，搞咗次最「豪」BBQ，（其實我覺得可以去盡啲...)
食材包括：A5 極品霜降黑毛和牛，Angus穀飼肉眼 + 西冷，雪花肥牛粒，
日本黑豚豬扒，紐西蘭羊仔架，德國豬肉腸，牛仔腸，雞肉磨菇腸，
鹿仔架，野春雞，日本長腳蟹，肥美鰻魚，鮑魚仔，珍寶鮮帶子，
海虎蝦，花蛤，大眼雞，烏頭，多國名牌啤酒，鮮果汁，超甜草莓，
巨峰提子，新鮮藍莓，B仔涼粉，芒果布丁， Häagen-Dazs，
特別介紹﹣法國頂級鵝肝。由於我負責揸video關係，相片暫時欠奉，
請用幻想力想像有幾精彩。

小半個韓國支持者（另大半個係日本），想推介俾「朋友」好多次，
食韓國料理唔一定要去韓國，香港都有好選擇，而且仲好有風味㗎！
尖沙咀金巴利街就出名叫韓國街，我最鍾意去「秀」！
唔係玩食字，我真係好鍾意「秀」！